Hie findet dir ganz viil Gschichte u Fotos vo vergangene Uftritte. Mir wünsche viil Spass bim düriläsä
2018
Im 2018 het Ruedi sech gmolde - er hetti itz die erste Stück glehrt gigä, öb mir äch is wette cho üebe - Das hi mir gmacht. Schnäll hi mir gmerkt, dass das guet chunt. Drum himer am erste Uftritt dörfe zuesäge.
Ds Jodlerquartett Steintal het üs iglade, bi ihrem erste Winterilüte mitdshälfe. Churz vorhär hi mir im Frutigländer dörfe es Interview gä. Dert isch üsi Formation vorgstellt, u Wärbig fürds Winterilüte gmacht worde.
Ds ganze Interview chönnt ihr hie läse.
2019
Während em 2019 hi mir de a witere Uftritte dörfe ufspile. Zum Bispil hei mir ar GV vor Allmenalpbahn dörfe Musig mache, oder o die erste Ländlerabete im Alpeblick Kandersteg übernä. Das si beides Uftritte, womer immer wieder im Kalender dörfe ischribe, was üs sehr fröit.
I däm Jahr hi mir üs aber o ane ganz bsundrigi Useforderig gwagt. Mir hi üs füre Folklore Nachwuchswettbewerb am 02. November ds Grenche agmäldet. Mit so viilne junge Mitstritter vor erä Jury ds spile, het üs alli chli närvös gmacht. Mir hi dr Schützekönig vom Ernst Müller und ds Überholmanöver vom Willi Vallotti gspilt. Leider hets üs ganz knapp nid i Final glengt. Trotzdem hei mir miteme positive Juryfeedback id Zuekunft dörfe starte.
Am 21.12. si mir agfragt worde fürne ganz bsunderige Uftritt. D Musikgesellschaft Kandersteg wet a ihrem Wiehnachtskonzert gärn ds Örgelihuus vom Ernst Jakober spilä, aber ned ohni Örgeli. Die Useforderig hei mir agno. Mir si zu ihne id Prob u hi güebt u tüüftlet, i welere Luutsterchi mer söll spile, das alli ghört wärde, gar ned so ifach. Schlussendlig dörfe mir aber ufne sehr spannende u erfolgriche Uftritt zrug gugge.
2020
Bekanntlech hets im 2020 wäge Corona ned all zu viil Uftritte chönnä gä. Trotzdem hi mir es Highlight dörfe erlebe. Ds Jodlerquartett Steintal het beschlosse e CD-Produktion usem Kandersteg ufzäh und üs gfragt, öb mir mit 4 Stück wette drufspile. E sehr spannendi Zyt het üs erwartet im Tonstudio.
Die CD isch no im glichige Jahr use cho. Uf dr Website vom Jodlerquartett Steintal chame die chufe oder natürlig o bi üs überds Kontaktformular. Es würd üs sehr fröie, weder dert chli göht ga dri lose - übrigens findet dir o die einti oder anderi Ufnahm vo der CD bi de Kostprobe hie uf dr Website
2021
Am 15. Ougust hi mir ads Ländlerträffe uf dr Engstligealp dörfe ga spile. Das isch ä sehr schöne Uftritt gsi. Ader Talstation hi mir ganz huufe anderi Formatione dörfe kenne lehrä. Mit dr Bahn simer de Uechi gfahre u mitem Eiachser abgholt worde für id Rüeblihütte. Ufem waggelige Holzbalkon hi mir üs igrichtet u scho viil ds lache gha. Immer wieder si nöii Lüt verbi cho u mir hi bi schönstem Wätter dr ganz Namitag d'Lüt underhalte.
I däm Jahr hi mir üses grösste Highlight, bis itze, dörfe erläbe. Im Summer het d'Jeanine es Telefon übercho: "Mir hi euch bim Nachwuchswettbewerb gseh. Hättet dir Interesse ids Potzmusig cho ds spilä?". Mir hi üs riesig gfreut. Am 7. Oktober isches de so wit gsi. Mir si ids Outo gstige, und uf Alpnach ids Restaurant Schlüssel gfahre (alli ä chli närvös). Dert acho hi mir die ersti Prob gha, Kameras sie igstellt worde, mir hi ä Frisier- u Schminktermin übercho u de no öppis chönnä ässä. Wos Abe isch worde, sid Ufnahme los gange. Jedi Formation isch amene Tisch ghocket u mir hi nie gwüsst, wär als nächsts drane isch. Zum Glück si mir scho gad als 2. dra cho. Mir hi genau 2 Mal üses Stück, Underwägs im Lastwage vom Fabian, müesse spiele. Bim erste Mal isch nume ds Publikum gfilmet worde u bim 2te Mal de mir. Üsi einizigi Chance - d'Närvösi isch no chli schlimmer worde. U de isches im Chaste gsi u mir hi dr Räst vo de Ufnahme dörfe gniesse.
Am 16. Oktober himer ds Ergäbnis chönne gseh - Ufem SRF isches usgrahlt worde, gugget doch gad sälber: Underwägs im Lastwage - Fabian Schmid
2022
Nach däm das im 2021 no kes Schwingfest het chönnä statt finde, isch es im 2022 so wit gsi: Ds erste Fraueschwingfest, organisiert vo dr Musikgsellschaft Kandersteg, het chönnä stattfinde. Am Namittag hi mir dert d'Zueschouer underhalte.
Im Herbst hi mir ds erste Mal ane grosse Jodlerabe dörfe ga spile. Dr President vom Jodlerklub Bigenthal het d'Jeanine vor mehrere Jahr am Kantonale Jodlerfest ds Brienz kennä glehrt. Speter hi mir no meh Mitglieder glehrt kennä, u si de agfragt worde, öb mir am Fritigabe ihres Programm mit es paar Stück wettä umrahme, u derna zum Tanz ufspilä. Mir hei üs sehr gfreut, u dä Abe ir volle Turnhalle ds Walkringe gnosse.
2023
O im 2023 himer äs speziells Engengement erläbt. Mir hi ad BEA dörfe ga spile. Ä ganz spezielle Uftritt. Zersch hi mir ir grosse Halle uf dr Rugebräubühni gmusiget: Viil Lüt si verbicho, u bliebestah. Drna isches ime Durchgang ob dr Stäge witergange. Das isch zersch chli gwöhnigsbedürftig gsi, aber o dert hi üs viil Lüt ghört. Am Schluss het no a bsunderigi Useforderig uf üs gwahrtet: Im Gärtli vom Rugebräuzält isch üse letzt Standort gsi - viil Lüt si daghocket. Hindedrane het üs ds Riiserad mit sire Musig chli "begleitet". I glube üs het das meh usem Konzept bracht als d'Zuehörer. Mir hi viil ds Lache gha und dert ä schöne Tag dörfe erläbe!
D'Bärgpredig im Üschene brucht ging musikalischi Begleitig (Hett ja ke Chilcheorgele uf der Alp). Ging umi ä schöne Uftritt! Mir fröjenes jedes Mal, wemer ahgfragt wärde.
Im Summer isch wieder e Uftritt a dr Engstlige agstande. Mir hi a Ländlersunntig a dr Engstlige chönnä ga spile. Ganz speziells Wätter het üs düre Tag begleitet. Drum hi mir usse afa spile, si de umi ini u no inisch usi u umi ini. D Lüt hi gad mit üs gwächslet.
Churz drufachi isch ds Ländlerwucheend in Adelbode agstande. Im Adler hi mir Zmittag übercho u derbi die andere Formatione chönne kennälehrä. Derna himer ufem Dorfplatz es erschts Stück zum Beste gä. De simer zrugg zum Adler, u hi d'Lüt uf der Terrasse dörfe underhalte. Öppe i dr Helfti hets de chli afa rägne, u mir si chli meh under d'Sunnestore grutscht. Wos de richtig het afa rägne, himer d'Lüt under dr Terrasse no chli meh bedrängt, u wos när g'haglet het, himer mit Täsche, Örgeli, Orgele u Bassgige d'Flucht gäg ini ergriffe - Das het hurti es Gstungg gä i dere Beiz. Inä hi mir de no chönnä ä trochnigi Schlussrundi spile.
Im Herbst si mir ds erste Mal anes Apéro vomene Hochzyt ga spile. Uf de Uftritt hi mir üs richtig gfreut. Danke viil Mal, Erika und Edi hi mir eues Apéro musikalisch dörfe umrahme. Mir wünsche euch alles Guete für d'Zuekunft!
2024
O im 2024 isch scho einiges glüfe. Im Winter himer a de Ländlerabete im Hotel Alpeblick ufgspilt, d Bärgpredigt im Üschene beglitet u mir hi o umi a die alljährigi GV vor Allmenalpbahn dörfe ga spile.
Es bsundrigs Highlight isch ds Waldfest vom Schützeverein Krattige gsi. Im Aschluss ads Fäldschiesse hi mir zum Tanz ufspgilt. Im gheitzte Festzelt, mit gueter Stimmig, het das sehr Spass gmacht. D Miriam Christeler het üs am Bass usgholfe.
Am 7. September het ä spezielä Uftritt uf üs gwartet: Mir si agfragt worde, öb mir ads Jubiläumsfest vor Gmind Stocken-Höfen würde cho spile. Mir sie scho uf der Website gross akündet worde: Bekannt aus Funk und Fernseh... hets ghisse, was üs scho grad chli närvös gmacht het. Dert acho, himer es Bendeli übercho, dass mir i die hindere Bereiche chöme u nach dr Musikgesellschaft Höfen si mir für die ersti Stund dran gsi. Mir si ufd Bühni cho, u de hets Mikrofon und ä Soundcheck gä, was d'Närvösi no chli het la stige. Mit de Schinwärfer hei mir aber ds Publikum chum gseh u hi beruhigt u mit viil Spass chöne musige. De hi mir d'Bühni witere Acts, wie der Band Total Minimal oder em Chor Voice Art Thun überlah, bis mer am Abe nomal ä Stund hi dörfe spiele.
Erstelle deine eigene Website mit Webador